ഞാനുമൊന്ന് പാടട്ടെ

ഞാനുമൊന്ന് പാടട്ടെ

സുനിൽരാജ്സത്യ

എനിക്കൊന്നു പാടണം, ഉച്ചത്തിൽ പാടണം- എല്ലാരും കേൾക്കുന്നപാട്ട് വേണം! താളത്തിൽ പാടണം, തകിൽകൊട്ടി പാടണം- തളരാത്ത നിങ്ങളെൻ കൂട്ടാവണം!

പാട്ടിൽ തേനൂറണം,പാടം പൂത്താടണം- പട്ടിണിത്തീയൊന്നണഞ്ഞ്പോണം! പതിനാറ് പൊൻപണം, പലനാളായ് നേടണം- പാലത്തറയില് നേർച്ച വേണം !

പാട്ടിൽ തീ കത്തണം, പടയണി കൊട്ടണം- ബാധയൊഴിപ്പിക്കാൻ ”ആട്ടു” വേണം!

പായിട്ട് ഉണ്ണണം, പാണന്മാരെത്തണം- പൂവിട്ട് മുറ്റം ഒരുക്കീടണം! പാട്ടിൽ തീകത്തണം, പാദങ്ങൾ തുള്ളണം- താളം പിടിക്കാത്തോർ മാറിപ്പോണം!

കുറ്റം പറയുന്നോർ പാട്ടിനു പോകണം, പാട്ടിങ്ങനെത്തന്നെ പാടിടും ഞാൻ! എനിക്കൊന്നു പാടണം, ഉച്ചത്തിൽ പാടണം- പാട്ടെന്നിലാശ്വാസ കാറ്റ് വീശും!

പാട്ടൊന്നു പാടണം, പാതകൾ താണ്ടണം- പട്ടട പൂകുമ്പോൾ കൂട്ട് വേണം! പട്ടടയിൽ കൂട്ടു പാട്ട് വേണം!!

Sunilrajsathya

Mob 9447575984