അവരുടെ ആള്
_________________
കല്യാണം കഴിച്ചു കൊണ്ടുവരുമ്പോൾ
അയാളേക്കാൾ രണ്ട് വയസ്സ്
കുറവേ ഉണ്ടായിരുന്നുള്ളൂ അവർക്ക്.
പെണ്ണുകാണല് തൊട്ട് എടോന്നാ
അയാളവരെ വിളിച്ചത്.
അവരയാളെ ആദ്യമൊക്കെ ശ് ശ് എന്ന് വിളിച്ചു.
പിന്നെ അതേ, കേട്ടോ എന്ന് വിളി മാറി.
പിന്നെയത് മനുഷ്യാ എന്നായി.
രാത്രിത്തണുപ്പിന്റെ കുത്തീന്ന് രക്ഷപെടാൻ
അയാൾടെ നെഞ്ചിന്റെ ചൂടിലേക്ക്
മുഖം ചേർത്ത്
കാതിലെ കമ്മല് അയാടെ രോമങ്ങളില് കുരുങ്ങുമ്പോ
അവരയാളെ ഡാ എന്നും വിളിച്ചു.
ഇടുപ്പില് തള്ളവിരലും ചൂണ്ടുവിരലും ചേർത്തയാള് മെല്ലെ ഞെരിക്കുമ്പോൾ
അവരയാളെ മെല്ലെ കടിക്കും..
പിള്ളേരുറങ്ങിയ രാത്രികളിലവര്
ഉള്ളിയും മുളകും അരിഞ്ഞു ചേർത്തുപൊരിച്ച
മുട്ട പകുത്ത് കഴിക്കും.
തണുപ്പുവീണ വെളുപ്പാൻകാലങ്ങളിലവര്
നെയ്യും ചക്കരയും ചേർത്ത കാപ്പി
തിളപ്പിക്കാൻ അടുക്കളയിൽ കയറും.
വെള്ളം തിളയ്ക്കണ നേരത്ത് അയാളവരുടെ പിൻകഴുത്തിൽ മീശരോമങ്ങളുരസും.
എന്നിട്ട് തിളയ്ക്കണ വെള്ളത്തില്
അവരുടെ പിന്നിൽ തന്നെ നിന്നുകൊണ്ട് ചക്കര ചുരണ്ടിച്ചേർക്കും.
എന്നിട്ട് വിരലിൽ പറ്റിയ ചക്കരത്തുണ്ട് അവരുടെ നനഞ്ഞ ചുണ്ടില് പുരട്ടും.
അവരുടെ നെയ്മണമുള്ള ചുണ്ടുകളിൽ ചുംബിച്ചുകൊണ്ടാണ് അയാളുടെ ദിവസം തുടങ്ങുക.
പിള്ളേര് ഹോസ്റ്റലീന്ന് വരണതൊഴികെയുള്ള
എല്ലാ ദിവസവും അയാളവരെ പുറം തേച്ചുകൊടുക്കാൻ വിളിക്കും.
വെണ്ണ പുരട്ടിയ ദോശകളെ
ചൂടാറാപ്പെട്ടിയിൽ അടച്ചുവെച്ച്
തുറന്നു കിടക്കുന്ന വാതിലിലൂടെ
അവര് അകത്തു വരും.
കോരിയൊഴിക്കണ വെള്ളത്തില് രണ്ടാളുമൊന്നിച്ച് നനയും.
അയാളവരുടെ പുറം തേച്ചുകൊടുക്കും,
വെള്ളമൊഴിച്ച് പതയകന്ന പുറത്ത് അയാള് ഉമ്മവയ്ക്കും.
താൻ മരിച്ചുപോയിട്ട് നീ പോയാൽ മതീന്ന് അയാളവളോട് ഇടയ്ക്കിടെ പറയും.
നിങ്ങളേം കൊണ്ടേ ഞാൻ പോവൂന്ന് അവരയാളോട് തിരിച്ചു പറയും.
ഒരിക്കെ പുറം തേയ്ക്കാൻ വിളിച്ചപ്പോൾ
അവര് വിളികേട്ടില്ല.
കുളിമുറിയുടെ തുറന്നു കിടക്കുന്ന വാതിലിലൂടെ അവരകത്തു വന്നില്ല.
അടുക്കളയിലെ എണ്ണമെഴുക്കുള്ള തറയില് വിയർത്തു നനഞ്ഞ കറുത്ത ബ്ലൗസും
മഞ്ഞൾ പുരണ്ട ചന്ദനനിറമുള്ള സാരിയുമുടുത്ത് പാതിയടഞ്ഞ കണ്ണുകളോടെ അവര് കിടക്കുന്നുണ്ടായിരുന്നു.
അവരുടെ കയ്യിലെ സ്പൂണിൽനിന്ന് ഉരുകിയ വെണ്ണ തറയിലേക്ക് പടർന്നൊഴുകി.
അവര് പോയതോടെ അയാളുടെ വെളുപ്പാൻ കാലങ്ങളിരുണ്ടുതന്നെയിരുന്നു.
കുളിമുറിയിലെ വെള്ളത്തിന് അയാളെ തണുപ്പിക്കാൻ പറ്റാതെ വന്നു.
അയാളുടെ രാത്രികൾക്കും
പകലുകൾക്കും ഒരേ നിറമായി.
അവരിറങ്ങിപ്പോയതിൽപ്പിന്നെ
അയാളുടെ ജീവിതത്തിന്റെ നിറങ്ങളിറങ്ങിപ്പോയിരുന്നത്രേ,
അവരിറങ്ങിപ്പോയതിൽപ്പിന്നെ
അയാളുടെ മധുരങ്ങളിറങ്ങിപ്പോയിരുന്നത്രേ,
അവരിറങ്ങിപോയതിൽപ്പിന്നെ
അയാളിലെ
അയാളിറങ്ങിപ്പോയിരുന്നത്രേ…..
____________________________
പ്രവീൺ പ്രഭ
This post has already been read 200760 times!
Comments are closed.