ഭൂമിയുടെ നിറമുള്ള ഭൂപടം

by Rema Prasanna Pisharody October 4, 2020

ഭൂമിയുടെ നിറമുള്ള ഭൂപടം

മനസ്സേ!
നീപറയുന്നു
നിനക്കീവഴി കടന്നാണ്,
രാവിനെക്കടന്നാണ്,
നീല നീലാകാശത്തെ-
കടന്ന്നിലാവിൻ്റെ-
പാതയും കടന്നാണ്
പോകേണ്ടതിനി, ഞാനീ
ജാലകംതുറക്കുന്നു
എൻ്റെയോർമ്മയിൽ
നിന്നുമായിരം വെൺ-
പ്രാവുകൾ പറന്നേറുന്നു
വെളുവെളുപ്പിൻ
മന്ദാരങ്ങൾ വിടരും
കിഴക്കായി,യൊലിവിൻ
ഇലച്ചാർത്തിലൂഞ്ഞാലിൽ
സ്വപ്നാടനം.

മനസ്സേ! നിന്നോട്ഞാൻ
പറഞ്ഞു പറക്കാതെ
പതിയെപതിയെ നീ
നടക്കൂ, പക്ഷെ നീയീ-
പ്രപഞ്ചം ചുറ്റി ചുറ്റി-
ചിതറിത്തെറിക്കുന്നു.
ഒരോരോ ചുമർചിത്രം
ഒരോരോ ലോകങ്ങളായ്
മാറുന്നു, പിന്നെ പെരും-
തിര പോലിരമ്പുന്നു
അരികിൽ വാതിൽക്കലായ്
കുളിരല്ലിരുളാണ്;
ഇരുളിൻ ദുർഭൂതങ്ങൾ
മിഴിനട്ടിരിപ്പാണ്.
ഉറങ്ങാനാവുന്നില്ല
പടിക്കൽനിന്നും കോൽ-
ത്താഴടർത്തി വരുന്നുണ്ട്
ഒരോരോ അരൂപികൾ
നിനക്ക്കാണാമെന്ന്
നീപറയുന്നു പക്ഷെ-
എനിക്കീയിരുൾപ്പുഴ
കടന്നേ പോണം,
നിന്നെയിരുത്തി തുഴഞ്ഞു
ഞാനക്കരെ പോകും
നമുക്കവിടെ പാർക്കാം-
നദിക്കപ്പുറം യന്ത്രപ്പുര-
മാൽസര്യമതില്ലാതെ
അവിടെ പാർക്കാം
ചുറ്റിപ്പടരും നിരാസത്തിൻ
കണ്ണികൾ മുറിച്ചീടാം
അവിടെ നിന്നെത്തേടി
വരില്ല നീരാളികൾ
ഭയത്താൽ വിഷം ചീറ്റും
ജലനീലനാഗങ്ങൾ
വാക്കിൻ്റെ തീപ്പക്ഷികൾ
ദേശാടനത്തിൻ വൃക്ഷ-
ക്കൂട്ടങ്ങളതിൽ വന്ന്
കാത്തു കാത്തിരിക്കുമ്പോൾ
മനസ്സേ! നിന്നോട്ഞാൻ
പറയുന്നെന്നെ ചുറ്റി
വരിഞ്ഞു മുറുക്കി നീ-
മൗനത്തിലൊതുക്കായ്ക!
വാതിലിൽ വിലങ്ങിട്ട്
നീയെൻ്റെ സഞ്ചാരത്തെ
പ്രാണനിൽ നിന്നും
മെല്ലെയടർത്താതിരിക്കുക.
തിടുക്കം പൂണ്ടെന്നൊരു
പകലെന്നെന്നെ ചൂണ്ടി
പറയും നേരം, സന്ധ്യ
ചിരിക്കുന്നേരം ഞാനീയിരുണ്ട
വാനത്തിൻ്റെയൊരു
കോണിലായ് സൂര്യനിതേ
പോലുണ്ടെന്നോർത്ത്
നിലാവായ് തെളിഞ്ഞിടാം